လိက်လလောၚ်တြး တ္ၚဲပၠန်ဂတးမန် မရနုက်ကဵု (၇၆)ဝါ
လၟေၚ်(၀၂/၂၀၂၃)
ပ္ဍဲဝၚ်ခေတ်တၟိဏံ မန်တအ် လုပ်ကၠုၚ်ပေါဲဗတိုက် နနဲရပ်လွဟ်ဝွံ လၟုဟ် စိုပ်သက္ကရာဇ် ၁၃၈၅၊ ဂိတုခ္ဍဲသဳပေၚ် (သၞာံ ၂၀၂၃၊ ဂိတုဩဂေတ် ၃၁) ဏံမ္ဂး တ္ၚဲပၠန်ဂတးမန် ဒှ်ကၠုၚ် မရနုက်ကဵု (၇၆) ဝါကီုရ။ ကေမ်ဇြာပ်လဝ်မူ အခေါၚ်ကံကုသိုလ်မန် မန်ဂွံဖန်က်ကေတ်မာန်၊ အခေါၚ်အုပ်ဓုပ်ညံၚ်သ္ဂောံ အုပ်ဓုပ် ကေတ်မာန်ကေုာံ အခေါၚ်ခၞံသၞောဝ် မန်သ္ဂောံ ခၞံကေတ်တ်မာန် ရန်တုဲ ပၠန်ဂတးကၠုၚ် ကုညးတၠအဝဵု အဆက်က်တအ်ရ။ ဗွဲကိုပ်ကၠာ ပ္ဍဲကာလ ပၠန်ဂတးနနဲ နာနာသာ်ဏံ ကုညးဒးဒုၚ်ပူဇဴလဝ် ဆီပဠက်ကေုာံ ပိုန်ဟာန်ဒြပ်ရတ်တအ်ကီု၊ ကုညးသၠးကၠေံကၠုၚ်လမျီု က္ဍိုပ်သ္ကိုပ်၊ သ္ဂံၚ် ကေုာံ ကောန်ညးဍုၚ်ကွာန်တအ် သ္ပမရှ်ေသှ်ေ ဗွဲမအဲပြဲရ။
အခိၚ်ဏံ တၠအဝဵုပၞာန်တအ် သီကေတ်အဝဵု နနဲ အဓမ္မတုဲ အုပ်ဓုပ်ကြာန်ဓဇန်ကၠုၚ် လတူ ကောန်ဍုၚ်ကောန်ကွာန်တအ်ရ။ အကာဲအရာ ပရေၚ်ပၞာန်၊ ပရေၚ်ဍုၚ်ကွာန်၊ ပရေၚ်ပိုန်ဒြပ် ကေုာံ ပရေၚ်ဆက်ဆောံ ဍုၚ်သ္အာၚ်ဂမၠိုၚ်တအ်ဂှ် ဒးတတ်ကၠောံဒၟံၚ် ဗွဲမကြေပ်ကြတ်၊ ရပ်ကေမ်ဇြာပ်ဒၟံၚ် လိက်ကသုက် NCA ကေုာံ သၞောဝ်သဇိုင်ဥပဒေ ၂၀၀၈ ကီုလေဝ် ကမၠောန်ဟွံအံၚ်ဇၞးရ။ ပၞော်ဂၠံၚ်တိတ် လက်ကြဴအိုတ် သွက်အဝဵုအာဏာသ္ဂောံတန်ကြန် ကုတၠအဝဵုပၞာန် (စကစ) တအ်မာန် ဂစာန်ရေၚ်တၠုၚ် ကၠောန်သ္ပကဵု ပေါဲရုဲမာဲဟီုဂှ်လေဝ် သွက်ဂွံဒလိင်အခိၚ်၊ သွက်ဂွံလီစၞာဲ ကောန်ညးဍုၚ်ကွာန် တအ်ဟေၚ် ရောၚ်ဂှ် ညာတ်ကၠးဖ္ဍးဒၟံၚ်ရ။
စကစ တအ် သီကေတ်အဝဵုတုဲ နူအလဵုအသဳညဳသၟဟ်ကောန်ဂကူ (NUG), ကံၚ်ဇြဳချပ်ဂၞန် ပရေၚ်ညဳသၟဟ်ကောန်ဂကူ (NUCC) ကေုာံ ကမ္မတဳညးစၞးစၠတ်ထဝ်ကၟိန်ဍုၚ် (CRPH) ဂမၠိုၚ်တအ် လလောၚ်တြးလဝ် သၞောဝ်သဇိုင်ဥပဒေ ၂၀၀၈ ဂှ် ပလီုထောံယျရောၚ်။ ဓမံက်ဒၟံၚ်ရုပ်ရဴ ပရေၚ်ပၠန်ဂတး တမ်ကညၚ် ဂွံကၠုၚ် ဗၞတ် (၂) သၞာံကဝက် ပြၚ်ကၠုၚ်ဂှ် ဂွံကၠုၚ်ပရေၚ်အံၚ်ဇၞး ဇဳဒိုဟ်ရ၊ ရန်ကဵု သွက်ဂွံ ဒက်ပ္တန် ကၟိန်ဍုၚ် ဖေဝ်ဒရေဝ်တုဲ ပံၚ်ဗစိုပ် လုပ်ဒၟံၚ်ပေါဲဗတိုက် မွဲစွံ ကုဒြဟတ်ပၠန်ဂတး ကောန်ဍုၚ်အရၚ် တအ်ဂှ်ရ ဂွံကၠုၚ်ဒြဟတ် ကုလဂါံဇိုၚ်တၟိဏံရောၚ် ပိုဲတအ် သ္ၚဳဂၠိပ်ညာတ်ကေတ်ရောၚ်။ သွက်အနာဂတ် ဂတ ဂွံရပ်စပ်သုၚ်စောဲအာ ပ္ဍဲကၟိန်ဍုၚ်ဖေဝ်ဒရေဝ် မံက်ဂတဝ်ကၠုၚ်ဏံဂှ် ဗွဲစၟတ်ဒးချူ သၞောဝ်သ္ဇိုၚ်ဥပဒေမွဲ ထေက်ရောၚ်။
နူကဵု ကံၚ်ဇြဳဖေဝ်ဒရေဝ်ဍုၚ်မန်ပိုဲဏံ ရပ်စပ်လဝ် မူဝါဒ လုပ်ပေါဲဗတိုက် အခေါၚ်တုပ်သၟဟ်၊ အခေါၚ်အုပ်ဓုပ် ကေုာံ အခေါၚ်ခၞံသၞောဝ်တအ်ဂှ်တုဲ ပ္ဍဲအနာဂတ် ကၟိန်ဍုၚ်ဖေတ်ဒရေဝ် ဒဳမဵုကရေဝ်ဇြဳ ဂတဏံ ဖေဝ်ဒရေဝ်ယူနေတ်မွဲ (တွဵုရးသ္ပစၞးဂကူမန်) သွက်ဂွံဒှ်စၞးဂကူမန်မွဲမာန်ဂှ် ရုန်ဂစာန်အာရောၚ် ကဵုဂတိပါၚ်ရ။ သွက်သ္ဂောံ ဗတိုက်သ္အးကၠေံ သၞောတ်တၠအဝဵုပၞာန် ကေုာံ သၞောတ်တၠအဝဵုနာနာတအ်ဂှ်တုဲ ပံၚ်ဗစိုပ်ကု ဂကောံပၠန်ဂတး တၞဟ်သ္အာၚ်တအ်ကီု၊ ဂကောံဗော် တိုၚ်ပ္ကဴရန်တၟံတုပ်တအ်ဂှ်ကီုတုဲ လုပ်အာ ပေါဲဗတိုက်ရောၚ်။ အလုံကောန်ဂကူမန် ညးမနွံကၠုၚ်ကဵု ဝၚ်ဗခိုၚ်ဗိုန် ဇၞော်မောဝ်တအ် ညးဂမၠိုၚ် သွက်ဂွံပံၚ်ဗစိုပ် ပါလုပ်အာ ကရောံ ကံၚ်ဇြဳဖေဝ်ဒရေဝ်ဍုင်မန်ပိုဲ ဗွဲညဳသၟဟ်အိုတ်ညိဂှ် မ္ဒးဗတိုက် ဖအောဝ်ဏာ ပ္ဍဲတ္ၚဲပၠန်ဂတး (၇၆) ဝါဝွံဏံရအဴ။
ကံၚ်ဇြဳဖေဝ်ဒရေဝ်ဍုၚ်မန်
သက္ကရာဇ် ၁၃၈၅၊ ဂိတုခ္ဍဲသဳပေၚ်
သၞာံ ၂၀၂၃ ၊ ဂိတုဩဂေတ် (၃၁)။
Email – [email protected]
