စၟတ်တ္ၚဲ။ ဒဳဇြေန်ပါ ၅၊ ၂၀၂၃
နူလောန်ကၠုၚ် နဝ်ဗေန်ဗာ (၁၂)၊ သၞာံ ၂၀၂၃ ဂှ် အကြာတွဵုရးဍုင်မန် ကဵု ဍုင်ကရေၚ် ဒှ်ပေါဲဗ္တိုက် ပ္ဍဲၜါသွာၚ်ဂှ်တုဲ နူပၞာန်တၠအဝဵုတအ် ဗၟံက်ကၠုၚ်ပေါဲဗ္တိုက်ရောၚ်။ ပ္ဍဲတၠအဝဵုပၞာန် ဖေတ်သေတ် (စကစ) ဂှ် အစောန်ဗ္တိုက်ပၞာန် ဟၟဲဒှ်ကၠုၚ်တုဲ တမ်ဒပ်၊ ဗဒိုပ်လွဟ်ဇၞော် နူသၟဝ်ဌာန်ဂအုပ်ဒပ်ရးအဂၞဲဂမၠိုၚ် ပန်ဖျေံဒၟံၚ် နကဵု လွဟ်ဇၞော်၊ ပန်ဖျေံလွဟ် နူက္ၜၚ်ကျာတုဲ စေှ်ပ္ဍဲတိဍာ်ဒေသမန် ကွာန်မၞုံ ပ္ဍဲပွိုၚ်ဍုၚ်ကျာ်မြဟ် ဗွဲမဂၠိုၚ်ရောၚ်။ ဟိုတ်ပန်ဖျေံဒၟံၚ် လွဟ်ဇၞော်တအ်ဂှ်တုဲ နူကောန်ညးဍုၚ်ကွာန် ဒေသပွိုၚ်ဍုၚ်ကျာ်မြဟ်တအ် ဂြိပ်ပါဲဒဴဒၟံၚ် ဗွဲမဂၠိုၚ်ဂၠေၚ်ရ။
ကံၚ်ဇြဳပၞာန်တအ် လုလောန်လဝ် လ္တူကောန်ညးဍုၚ်ကွာန် ဟွံမွဲကုဓရ်ဗစာရဏာမၞိဟ်တုဲ ကၠောန်ဗဒှ်လဝ် ပ္ဍဲပွိုၚ်ဍုၚ် ကျာ်မြဟ်မွဲဓဝ်ဟွံသေၚ် လပါ်တွဵုရးဍုင်မန် သ္ကုတ်သၟဝ်ကျာ မပ္တံကဵု ပွိုၚ်ဍုၚ် ကျာ်ထဝ်၊ ၜဳကလေၚ် ကေုာံ သဓီု တအ်ဂှ်ကီု သ္ကုတ်သၠုၚ်ကျာ တွဵုရးဍုင်မန် မပ္တံကဵု ပွိုၚ်ဍုၚ်ရေဝ်၊ ဇြပ်ဗု တအ်ဂှ်လေဝ် ကောန်ညးဍုၚ်ကွာန်တအ် ဒးဒုၚ်ဒဝ်ကၠုၚ်ဘဲ ဗွဲမဂၠိုၚ်ရောၚ်။ ကံၚ်ဇြဳပၞာန်တၠအဝဵုတအ် ဗ္တိုက်ပၞာန်ဂှ် ဗီုပြင် ပေါဲပၞာန်ဗ္တိုက်မွဲဟွံသေၚ် ဂၠာဲသၞဖန်ဗ္တိုက်ဒၟံၚ် လ္တူကောန်ညးဍုၚ်ကွာန် ညးဒုဟ်ဒန်ဟၟဲ ဂမၠိုၚ်ဟေၚ်ရောၚ်။ နူကံၚ်ဇြဳတၠအဝဵုပၞာန်တအ်ဂှ် ပ္ဍဲတွဵုရးဍုင်မန် သၟးဟွံသေၚ် သီုအလုံကၟိန်ဍုၚ်မွဲ ကၠောန်သ္ပဒၟံၚ် လုလောန်သပလဝ်ပကီုပရာပ် အမှုဗွဲမဂလိုင် မပတံကဵု ကမၠက်ဂကူ (Crimes Against Humanity) ကေုာံ လုလောန်လဝ်အမှုဂဗုတ်ရာဇဝတ်ပၞာန် (War Crimes) တံတုဲ နူကံၚ်ဇြဳ ဖေဝ်ဒရေဝ်ဍုၚ်မန်ဏံ ဒစဵုဒစးဗွဲမသ္ကာတ်မြဟ်ရောၚ်။
ယွံ ဂကူမန် ညးဍုၚ်ကွာန်မန်တအ်အဴ . . .
ပွကမၠောန်တၠအဝဵုပၞာန်တအ် အတိုၚ်အခိုက် “ဟွံမာန်ကၞိစံၚ်စာတ်”ဂှ် နွံကၠုၚ်မံၚ်လၟေၚ်ၚ်တုဲ ထပ်ကဵုထပ် ဂၠာဲသၞကြာန်ဓဇန် လ္တူကောန်ညးဍုၚ်ကွာန် ဒုဟ်ဒဏ်ဟၟဲတအ်ဂှ်ဏီရောၚ်။ နကဵု ကောန်ညးဍုၚ် ကွာန်တအ် ဂွံဗလးဘဲ သွက်ဂီုကၠီုဇကုဇကုဂှ် ပွမဒးမၚ်မွဲ မပ္တံကဵု ပါဲဒၟံၚ်ဒၞာဲမၞိဟ်ကောံကလောံ၊ ၜံက်စွံလဝ် ကတိုၚ်အောပ်မါၚ် (ဥုံမၚ်) လၟိုန်န် ဒးက္လၚ်ကေတ်ပရိုၚ်ဆေၚ်စပ်ကဵုပၞာန်ချဳဒရာၚ်၊ သီုကဵု ကောန်ညးဍုၚ်ကွာန်တအ် ဒးဒ္ဂေတ်ဗက် တင်နင်ဗီုဒးမံင်ပ္ဍဲပေါဲဗ္တိုက်ရောင် မ္ဒးဆဝ်မ္ၚုဟ်ဏာရ။ အခိၚ် ကောန်ညးဍုၚ်ကွာန်တအ် ပါဲဒၟံၚ်ဘဲပၞာန်ဏံ မပ္တံကဵု ဂကောံသၚ်ဂမၠိုၚ်၊ ဂကောံမဟာဇန်ဂမၠိုၚ်၊ ဂကောံပရေၚ်ဍုၚ်ကွာန် အပ္ဍဲဍုင်ဂမၠိုၚ် တအ် ညံၚ်သ္ဂောံကဵုအရီုအဗၚ်မာန်ဂှ် ဗတိုက်ဖ,အောဝ်ဏာရောၚ်။
ညးဍုၚ်ကွာန်တအ်လေဝ် အခိၚ်လၟုဟ်ဝွံ ဒှ်မံင်အခိၚ်ကာလ ဒးဘဲဒဏ်ပၞာန်တုဲ ဗွဲမဂတာပ်အခိၚ် ဒးပလေဝ်လဝ် စၞစ ဗွိုက်လတက်ကဵု ကပေါတ်နာနာ သွက်ကောန်ညးဍုၚ်ကွာန်တအ် နွံပၟိက်တအ်ရောၚ်။ နူဖေဝ်ဒရေဝ်ကံၚ်ဇြဳဍုၚ်မန်ပိုဲလေဝ် သွက်ကောန်ညးဍုၚ်ကွာန်တအ် ရီုဗၚ်ဒၟံၚ်ပရေၚ်မှာဇန် နွံကၠုၚ်ဒၟံၚ်တုဲ ကေတ်အဆက် ကေတ်အရီုအဗၚ် မာန်ရောၚ်ဂှ် မ္ဒးကဵုဏာသမ္တီရောၚ်။
ယွံ သၟတ်မန် ညးဍုၚ်ကွာန်မန်တံအဴ။
ယဝ်ရတၠအဝဵုပၞာန် အုပ်ဓုပ်ဒၟံၚ် မွဲဒမြိပ်ပၠန်မ္ဂး ပွမဍဵုဍိုက် လလိုန်ဗပိန်တအ်ဂှ် ဆက်တုဲတန်တဴ ကတဵုဒှ်အာပၠန်ရောၚ်။ ကောန်ညးဍုၚ်ကွာန်ပိုဲ သွက်ဂွံဒက်ပတန် ကၟိန်ဍုၚ်ဖေဝ်ဒရေဝ်ဒဳမိုကရေဇြဳ မၞုံကဵု ကံကုသဵု ဇကုဂွံဖန်ဖက် ကေတ်တ်မာန်ဂှ် ဒးဗ္တိုက်သရိုဟ်ထောံ တၠအဝဵုပၞာန် နနဲရပ်လွဟ်ပၠန်ဂတးဟေၚ်ရောၚ်။
ဟိုတ်သာ်ဂှ်ရ သၟတ်မန်၊ သၟတ်ကောန်ဍုၚ်အရၚ်မတန်တဴဒၟံၚ် ပ္ဍဲတွဵုရးဍုၚ်မန်တအ် ဂွံဒက်ပတန်အာ ကၟိန်ဍုၚ်ဖေဝ်ဒရေဝ် ဍုၚ်ဗၠးၜး အခေါၚ်မၞုံကဵု အခေါၚ်တုပ်သၟဟ် သွက်အနာဂတ်မာန်ဂှ် ပ္ဍဲအခိၚ် ဗ္တိုက်သရိုဟ် ထောံ သၞောတ်တၠအဝဵုပၞာန်လၟုဟ်ဏံ ကောန်ညးဍုၚ်ကွာန်တအ် ညးညးအဲအဲ ပါလုပ်အာ ပ္ဍဲလၟေၚ်ကမၠောန် ပရေၚ်ပၠန်ဂတး မွဲနဲမွဲဗီုအိုတ်တုဲ ရီုဗၚ်ပါလုပ် ဗပေၚ်အာဒြဟတ်မွဲကရောံညိဂှ် မ္ဒးဗ္တိုက်ဖအောဝ်ဏာ ဗွဲမဇြိုဟ်ဟ်နက်က်ရောၚ်။
ကံၚ်ဇြဳဖေဝ်ဒရေဝ်ဍုၚ်မန်
ဆက်သွယ်ရန် –
Email: [email protected]
+ 66 94 876 9284
