စၟတ်တ္ၚဲ – ၂၈ ဂိတုဒဳဇြေန်ဗာ ၂၀၂၃။
စပ္တံနူကဵု သၞာံ ၁၉၄၆ ဂိတုဒဳဇြေန်ဗာ ၂၈ ဂှ် နူကဵု ဂကောံသၟတ်ကွးဘာ ဍုၚ်လ္ဂုၚ်တအ် စဒက်ပ္တန်လဝ် ဂကောံသၟတ်မန်တုဲ ဒုင်သဇိုင်ကဵု ပေါဲသၠာဲဂတးလညာတ်သၟတ်မန် (၂၀၀၇-၂၀၁၂) ကဆံၚ်ဆံၚ်တုဲ ပ္ဍဲတ္ၚဲစဒက်ပ္တန် ဂကောံသၟတ်မန် (ဒဳဇြေန်ဗာ ၂၈) ဂှ် သ္ပကၠုၚ်ဒတန် စၟတ်သမ္တီလဝ် တ္ၚဲသၟတ်မန်တုဲ ကၠောန်သ္ပကၠုၚ်လဝ် တ္ၚဲသၟတ်မန်ဝွံ တ္ၚဲဏံမ္ဂး ပေၚ်ကၠုၚ် အလန် ဒွါဒသမရ။
ထံက်ရံၚ်ကဵု ဝၚ်မန် အဆက်က်မ္ဂး သၟတ်မန်ဂှ် ဒှ်ဇုတ်ဓရံၚ်ဂကူကီု ဒှ်ညးမလုပ် ပၠန်ဂတး သွက်ဍုၚ်မန်ကီုတုဲ ဒှ်ကၠုၚ်က္ဍိုပ်သ္ကိုပ်မန် အနာဂတ်တေံဂှ် နွံကၠုၚ်မံၚ်ရ။ ပ္ဍဲဝၚ်ပၠန်ဂတး မန် ညးမတိတ်ဂြိုပ် လုပ်ပၠန်ဂတး ရပ်လွဟ်လေဝ် ဒှ်သၟတ်မန်တုဲ သၟတ်မန် တ္ၚဲဏံဂှ် ဒးဒှ် သွက်က္ဍိုပ်သ္ကိုပ်ဍုၚ်မန် အနာဂတ်ရ။
ယွံသၟတ်မန်တအ် အခိၚ်တ္ၚဲဏံဂှ် ဒှ်အခိၚ်ပၠန်ဂတး သွက်ဍုၚ်မန် ခေတ်တၟိ မွဲဝါပၠန်ရ။ ဇြဟတ်သၟတ်ဟေၚ် ကေတ်ကဵုပေါဲအံၚ်ဇၞးမာန်တုဲ ဇြဟတ်သၟတ်မန်ဂှ် ဒှ်ဇြဟတ်ကိစ္စဇၞော် သွက်ဂကူမန်ရ။
ပ္ဍဲသၞာံ ၂၀၂၁ ဂှ် ကံၚ်ဇြဳပၞာန်ပလံၚ်ၜး သီကေတ်အဝဵု ကၟိန်ဍုၚ်ပိုယ်တုဲ သၟတ်ဂကူ ကောန်ဍုၚ်အရၚ် ဗွဲမဂၠိုၚ်လေဝ် တိတ်ပၠန်ဂတး ရပ်လွဟ် ကေုာံ တိတ်ပၠန်ဂတး နဲကဲနာနာသာ်ဂှ် ဂွံဆဵုညာတ် ကေတ်ရ။ ပ္ဍဲပရေၚ် ပၠန်ဂတး တ္ၚဲဏံဂှ် သၟတ်မန်ပိုယ်လေဝ် ပါလုပ်ပ္ဍဲဂကောံ ပၠန်ဂတး ရပ်လွဟ် ကေုာံ ပၠန်ဂတး နဲကဲတၞဟ်ခြာ မံက်တိတ်ကၠုၚ်နွံရ။ ပ္ဍဲအကာဲအရာပၠန်ဂတး တ္ၚဲဏံဝွံ ဇြဟတ် သၟတ်မန်ပိုယ် ညံၚ်ဂွံ ကောံကလောံမွဲစန်မာန်ဂှ် ပၟိက်ဇၞော်တုဲ ဟိုတ်နူပရေၚ်ခက်ခုဲ ကၟိန်ဍုၚ်ပိုယ်တုဲ ဇြဟတ် သၟတ်မန် ပိုယ် ပြးဇးစိုပ်အာ ဍုၚ်သ္အာၚ်ဗွဲမဂၠိုၚ်ဂၠၚ် ဂွံဆဵုညာတ်ကေတ်ရ။
ဟိုတ်ဂှ်ရ –
၁။ ကံၚ်ဇြဳပၞာန်ဗၟာဂှ် ဒှ် “သၞတမ်ကဝ်မန်” တုဲ ဇၟာပ်သၟတ် ဗွဲမဗွဲကဵုဒၞာဲညးကုညး ညံၚ်ဂွံလုပ်အာ ပေါဲဗ္တိုက် “သၞတမ်ကဝ်” မွဲစွံမာန်ကီု။
၂။ နကဵုသၟတ် အကြာဇြဟတ် ဗွိုၚ်ညးကုညး ကောံကလောံ၊ ပံၚ်တောဲကု ညးဍုင်ကွာန်မန် တုဲ ညံၚ်ဂွံ လုပ်ဗပေၚ်ဇြဟတ်ကု ဂကောံပၠန်ဂတးမန်ဂမၠိုၚ် မလုပ်မံၚ်ပေါဲဗ္တိုက်တအ်ကီု။
၃။ ဂကောံသၟတ်မန်ဂမၠိုၚ် သ္ပတိုၚ်တုဲ အလုံသၟတ်မန် သ္ဂောံဒှ်မွဲဇြဟတ် ကေုာံ သ္ဂောံဒှ်အာ အထံက်အရီု ပၠန်ဂတးမန်ကီု။
၄။ ဇြဟတ်ပၠန်ဂတးရပ်လွဟ်ကီု ဇြဟတ်ပၠန်ဂတး သွာၚ်ပရေၚ်ဍုၚ်ကွာန် သၟတ်မန် ညံၚ်ဂွံ လုပ်ကေတ်အာ တာလျိုၚ်အခန်ညး ကဏ္ဍအဲမာန်ကီု။
၅။ ဒုင်သ္ဇိုၚ်ကဵု မူဖေဝ်ဒရေဝ်တုဲ ညံၚ်သ္ဂောံဒက်ပတန်အာ အလဵုအသဳမန်၊ သၠဲပတိတ်အာ ပရေၚ်အုပ်ဓုပ်ဍုၚ်မန် ဆက်စပ်ကဵု အဝဵုပိတန်တုဲ ညံၚ်သ္ဂောံမံက်ဂတဝ်မာန်ကီုဂှ် အလုံ သၟတ်မန်၊ ဂကူမန် မ္ဒးပူဗိုၚ်ဗပေၚ်အာ ဇြဟတ်အိုတ်ညိဂှ် ဆဝ်ဗ္ၚုဟ် လလောၚ်တြး ဏာရအဴ။
Download PDF: လိက်လလောင်တြး တ္ၚဲသၟတ်မန်ဒွါဒဿမ
ကံင်ဇြဳဖေဝ်ဒရေဝ်ဍုၚ်မန်
