လၟေၚ်လိက် (၈/၂၀၂၄)
ဂိတုမာတ်(၈)၊ သၞာံ ၂၀၂၄
ဂိတုမာတ် (၈) တ္ၚဲဏံ နူကံၚ်ဇြဳဖေဝ်ဒရေဝ်ဍုၚ်မန် သ္ပစၟတ်သမ္တီကု တ္ၚဲညးဗြဴအလုံဂၠးကဝ်တုဲ ဆေၚ်စပ်ကဵု ညးဗြဴဂမၠိုၚ် ကေုာံ ကောန်ၚာ်သၟတ်ဗြဴဂမၠိုၚ် မၞုံအပ္ဍဲကၟိန်ဍုၚ်တအ် သ္ပတိုၚ်ကဵု ပရေၚ်ဖောအ်ဗြေဝ်တဴတက် ကေုာံ ဓရ်ဗ္စာရဏာ ပရေၚ်မၞိဟ်တုဲ သွက်ဂွံထံက်ရီုအာညိဂှ် သ္ပဂတိပါင် ရာဒနာဏာ ပ္ဍဲတ္ၚဲညးဗြဴအလုံဂၠးကဝ် ဏံရအဴ။
ကၟိန်ဍုၚ်ပိုဲ အခိၚ်လၟုဟ် ဒးဆဵုဂဗဇီုကပိုက်ဒၟံၚ် အခက်အခုဲနာနာ၊ ပွမဒးဒုၚ်ဇီုကပိုက် ဘဲဒဒိုက်ဇၞော်ဇၞော် ပ္ဍဲပွဳပွူ မဟာဇန်တအ် ဂွံပသောၚ်သ္အးဗွဲမပြဟ်မာန်ဂှ် နွံဒၟံၚ်ပၟိက် ဇၞော်ကဵုဒြဟတ်ရောၚ်။ ပၟိက်မိက်ဂွံဖန်ဇန် နဒဒှ်ဂၠးတိ တဴတက် ဖောအ်ဗြေဝ် မဍိုက်ပေၚ်ကဵုထတ်ယုက်မွဲ သ္ဂောံဒှ်ဂှ် ဒးကဵုအာဒြဟတ် အပ္ဍဲ ကဏ္ဍပရေၚ်မဟာဇန် ဇဳဒိုဟ်တအ်ဏံ သွက်ဂွံဒုၚ်ဂိုၚ်ကေတ် ပရေၚ်တုပ်သၟဟ် တြုံဗြဴ (Gender) ကေုာံ ကဏ္ဍဒးဖျေံသ္ဂုတ်သွာတ် ဂမၠိုၚ်တအ်ဂှ် ညးဗြဴဂမၠိုၚ် သာတုဲဂွံပါလုပ်ရောၚ်။ နူအစောန်စရာဲဒြဟတ် ညးဗြဴဂမၠိုၚ်တအ် ပတဝ်ဏာကဵု ပရေၚ်ၜိုဟ်လလမ် ညံၚ်သ္ဂောံတန်တဴအာ ဗွဲမခိုၚ်ဗိုန် ကေုာံ ပရေၚ်ဖောအ်ဗြေဝ်ညံၚ်သ္ဂောံတဴတက် တအ်ဂှ် ဆက်စပ်ရေၚ်တၠုၚ်အာမာန်ရောၚ်။
ကံၚ်ဇြဳဖေဝ်ဒရေဝ်ဍုၚ်မန်ဝွံ အပ္ဍဲတ္ၚဲညးဗြဴအလုံဂၠးကဝ်ဏံ အတိုၚ်ရမျှာၚ်ကမြဴ “ကဆံၚ်ဒၟံၚ်ဘဝမၞိဟ် ညံၚ်သ္ဂောံတဴတက် အပ္ဍဲကဏ္ဍနာနာဏံ ညးဗြဴတအ် ပါလုပ်အိုတ်စိုအ်” သ္ဂောံကိတ်ညဳဂှ် သွက်ဂွံရီုဗၚ် ထံက်ပၚ် ညးဗြဴ ကေုာံ ကောန်ၚာ်သၟတ်ဗြဴ၊ ကသပ်ညာဏ်ညးတအ်ဂမၠိုၚ်၊ ပရေၚ်ဖန်ဗဒှ် ကၠောန်ပ္တိတ်နဲကဲ ဂမၠိုၚ် ဂၠးတိပိုဲ သာတုဲဂွံခိုဟ်တိုန်ကီု၊ ရန်တၟအ်ကဵု ပရေင်ပြံၚ်သၠာဲတုဲ ညးချဳဒရာၚ်တအ်ဂမၠိုၚ် ကုညးက္ဍိုက်ပ် ကွပ်မၞိဟ်ကဆံၚ်နာနာတအ်ဂှ် နူကံၚ်ဇြဳဖေဝ်ဒရေဝ်ဍုၚ်မန်ပိုဲ သ္ပစၟတ်သမ္တီတုဲ ညးဗြဴတအ် ညံၚ်သ္ဂောံပါလုပ် ဂၠိုၚ်ဂၠိုၚ်မာန်ဂှ် ကဵုဒြဟတ် လဘာ်အာရောၚ်ဂှ် ကဵုဏာဆန္ဒ ဗွဲမဇြိုဟ်နက်ရောၚ်။
ပလံၚ်ဗစိုပ် ဂလာန်ပၟိက်ဇၞော်ဂမၠိုၚ်
• အကြာ တၚ်ကြေပ်ကြတ်သၞာံ ဗွဲမလအ်လ အပ္ဍဲကွပ်နာနာဝွံ သွက်ပရေၚ်ဂွံဒတူလိုၚ်အာ အခေါၚ်အရာ ညးဗြဴတအ် အခိၚ်ဏံ သာတုဲပၟိက်ဇၞော်ကၠုၚ်ရောၚ်။
• သၞာံ ၂၀၂၄ အပ္ဍဲကၟိန်ဍုၚ်ပိုဲ ကတဵုဒှ်ဒၟံၚ် အကြာပရေၚ်ကြေပ်ကြတ် ကွပ်ဇဳဒိုဟ်တအ်ဝွံ ဇီုကပါ်ကၠုၚ် ကဏ္ဍဘဝဒၟံၚ်မၞိဟ်နာနာတုဲ မၞိဟ်ဗြဴ ကေုာံ ကောန်ၚာ်သၟတ်ဗြဴ ပ္ဍဲကၟိန်ဍုၚ် လၟိဟ် ၉.၇ ပြကောတိကိုဋ်တအ် နွံပၟိက်ဒၟံၚ် အရီုအဗၚ် ထံက်ပၚ်ဓရ်ဗ္စာရဏာ ပရေၚ်မၞိဟ်ရောၚ်။
• ဟိုတ်နူကြေပ်ကြတ် စပ်ကဵု ထံက်ပၚ်ဗ္စာရဏာပရေၚ်မၞိဟ်ဂမၠိုၚ်တုဲ သွက်ညးဒးဒုၚ်ဒဝ်လဝ် သီုညးဗြဴ ကေုာံ ကောန်ၚာ်သၟတ်ဗြဴတံဂှ် အရာပကီုပရာပ်ညံၚ်သ္ဂောံသ္အးဇ္ၚးတုဲ ဘဝမၞိဟ် သ္ဂောံဍိုက်ပေၚ်မာန်ဂှ် နွံပၟိက်ကဵု ပရေၚ်ဓလိုက်တမ်ရိုဟ် ဗွဲမပြဟ်ပြေဟ်ရောၚ်။
ကံၚ်ဇြဳဖေဝ်ဒရေဝ်ဍုၚ်မန်
ကေတ်အဆက် –
မိကောန်ဆာန်နန် (Signal) +95 977 637 3543
မိသုဇာထဝ် (Siganl) 094 2527 9752
